Robert Henryson: Orpheus and Eurydice with Robert Henryson: The Want of Wise Men (Page 15 of 20)
p.163) That is to say. makis persuasioune
To draw oure will. and oure affectioun
In ewiry elde fra syn / and foule delyte
This dog oure saule has no power to byte
The second monstris ar the sisteris thre
Alecto Megera. and Thesiphone
Ar noucht ellis in bukis as we rede
Bot wickit thoucht evill word & frawart dede.
Alecto is the bolnyng of the hert
Megera is the wikkit word outwert
Thesiphone is operacioun
That makis fynal execucioun
Of dedly syn. & thir thre turnis ay
Ane vgly quhele is noucht ellis to sa
That wardly men sum tyme ar castin hie
Apon the quhele / in grete prosperitee
And wyth a quhirl vnwarly or thai witte
Ar thravin doune to pure & law estate
Of ixione that in the quhele was spred
I sall the tell sum part as I haue red
He was on lyve brukle & lecherouse
And in that craft hardy and curageouse
That he wald noucht lufe in na lawar place
Bot Iuno. quene of nature & goddace
And on a day he went vp in the sky.
Sekand Iuno thinkand with hir to ly
Scho saw hym cum and knew his full entent
A rany cloud doune fra the firmament
Scho gert descend. and kest betuene thaim two
And in that cloud his nature yede hym fro
Of quhilk was generit the Centauris
Half man half horse apon a ferly wyse
Than for the inward crabbing and offense
