Inglis Collection of printed music > Printed music > Composite music volumes containing different issues of Thomson's octavo collection of the songs of Burns and Sir Walter Scott > Volumes 1-2 > Select melodies of Scotland, interspersed with those of Ireland and Wales

29
THE LOTHIAN LASSIE.
THE SONG WRITTEN FOR THIS WORK
BY BURNS.
Last May a braw wooer cam' down the lang glen,
And sair wi' his love he did deave me ;
I said there was naething I hated like men,
The deuce gae wi' him to believe me, believe me,
The deuce gae wi' him to believe me.
He spak o' the darts in my bonny black een,
And vow'd for my love he was dying ;
I said he might die when he liked for Jean :
The Lord forgie me for lying, for lying,
The Lord forgie me for lying !
A weel stocked mailin, himsel' for the laird,
A marriage aff hand, were his proffe"s :
I never loot on that I kent it, or cared,
But thought I might hae waur offers, waur offers,
But thought I might hae waur offers.
But what would ye think ? in a fortnight, or less,
The deil tak' his taste to gae near her !
He up the lang loan to my black cousin, Bess,
Guess ye, how (the jade !) I could bear her, could bear her,
Guess ye, how (the jade !) I could bear her.
But a' the niest week as I petted wi' care,
I gaed to the tryste o' Dalgamock,
And wha but my fine fickle lover was there ;
I glowr'd as I'd seen a warlock, a warlock,
I glowr'd as I'd seen a warlock.
But ower my left shouther I gae him a blink,
Lest neebours might say I was saucy ;
My wooer he caper'd as he'd been in drink,
And vow'd I was his dear lassie, dear lassie,
And vow'd I was his dear lassie.
I spier'd for my cousin fa' couthy and sweet,
If she had recover'd her hearing ;
And how her new shoon fit her auld shachl't feet ;
But, Heavens ! how he fell a-swearing, a-swearing,
But, Heavens ! how he fell a-swearing.
He begg'd for gude-sake ! I wad be his wife,
Or else I would kill him wi' sorrow :
So, e'en to preserve the poor body in life,
I think I maun wed him — to-morrow, to-morrow,
I think I maun wed him to-morrow.