Glen Collection of printed music > Printed text > Harp of Renfrewshire

Of the stark aqua vitte they baith lo'ed a draiipie,
And when capernutie then aye unco happy ;
Of a' in the parish this pair was the bauldest,
As burns brattle loudest when water's the shaulest.
Whiles Lauchie wad spurn at the whisky like poison
But after he preed it, wad drucken an ocean ;
Maggy, too, had a fell tippling gate o't,
An' aye took a drappie whene'er she could get it.
Lauchie had looms, but was lag at the weaving,
His fingers and thumbs though, were active in thieving ;
Lauchie had looms that but few could hae wrought on,
For Lauchie had schemes that but few wad hae thought on.
Lauchie had secrets weel worthy the keeping,
For Lauchie made siller while ithers were sleeping,
Lauchie a second sight surely had gi'en him,
An' saw things wi' less light than ithers could see them.
But Lauchie did dee, and was welcomely yirdet,
The folks said his conscience was unco weel girdet ;
When it took a rackin', it beat a' description,
His oily-gaun tongue, too, was fu' o' deception.
Now Lauchie's awa, and the bodies in Mauchlin,
Wish Meg in her kist, and as deep sheugh'd as Lauchlan
But Lauchie for cunning surpass'd a' his fellows,
He dee't just in time for escaping the gallows.