In the country places

HORACE, CAR. I. 9
VIDES UT ALTA STET NIVE CANDIDUM SORACTE
Drift oxter-deep haps Bennachie,
Aneth its birn graens ilka tree,
The frost-boun’ burn nae mair is free
To bicker by.
Haud on the peats an’ fleg the cauld,
An’ ere the hoast gets siccar hauld
Yon luggit pig 0’ fower year auld
Sail first gang dry.
On Providence oor cares we’ll cast,
The power that stirs will lay the blast
When larch an’ rodden firm an’ fast
Will stand ance mair.
Whatever comes we’ll grip the day,
It's oors to drink an’ dance an’ play,
The morn can bring us what it may
Grey heads or sair.
Let gloamin’ find us wooers still
True to oor trysts by haugh or hill,
The lassie’s lauch will guide you till
She’s catch’d an’ kiss’t.