Series 4 > Stirling Presbytery Records 1581-1587

140 STIRLING PRESBYTERY RECORDS 1581-1587
that scho past to the said woll becaus scho was seik, and confessis
scho drank of it and that scho past about the said woll and sat doun
on hir kneis and prayit to Chrystis Sonday and Chrystis woll to
help hir befoir scho drank of it and denyis all uther ceremoneis.
The said Hellein Dow being oft tymis callit compeirit nocht.
Thairfor the brethrein findis her contumax and thairfor ordanis hir
to be summond to heir and se hir self decemit to be excommunicat
for his contumacitie and malicius disobedience with certificatioun
and scho failze the brethrein will proceid and decern hir to be
excommunicat, as said is.
Margaret Downy, Jonet Allane: The quhilk day ane summondis
beand producit deulie execute and indorsit upone Marione Watsone
in Touch, Margaret Downy in Polmais, Jonet Mayne, dwelland
undir Johnne Downy in Mossyd, chairgeing thame to have com¬
peirit befoir us the said day to answer at the instance of the kirk for
passing in pilgramage to Chrystis woll and using of superstitioun
and idolatrie thairat expres againis Godis Word undir the paine of
excommunicatioun, compeirit the said Margaret Downy and
confessis scho past furth of hir awin hous myndit to have past to the
said woll and wald have past thair war nocht ane certane halbert
men met thame ane lytill or thai come to the woll and struik them
away, and confessis the occasioun quhairfor scho was myndit to
have past thair was becaus of seiknes scho hade and belevit to have
bein the better throw hir passing thair. Compeirit Jonet Allane,
spous to Richard Nycoll in Carse, and confessit conforme to the
said Margaret Downy in all pointis. With the quhilkis confessionis,
the brethir, being ryplie advysit, findis the saidis personis nocht to
have compleit thair pilgramage nor committit na idolatrie at the
said woll as utheris did. Thairfoir thai ar bayth ordeinit to mak
public repentence in the publict plaice appointit for penitentis in
thair parroche kirk of Sanct Ninniane on Sonday nixt, viz., the
last day of this instant in tyme of sermond undir the paine of
disobedience. The saidis Marione Watsone and Jonet Mayne, being
oft tymis callit, compeirit nocht. Thairfor the brethrein findis
thame contumax and ordanis thame to be summond to heir and se
thame selffis decemit to be excommunicat for thair contumacitie
and malicius disobedience, with certificatioun and thai failze the
brethrein will decern thame to be excommunicat, as said is.