An Dualchas Beò : Sgoil Chiùil na Gàidhealtachd
Stèidhicheadh Sgoil Chiùil na Gàidhealtachd sa Phloc ann an 2000 le maoineachadh bho Mhaoin Sàr-mhaitheis Riaghaltas na h-Alba. Bhon uair sin, tha i air cliù a chosnadh mar àite far an leasaich òigridh thàlantach an cuid sgilean ann an ceòl tradaiseanta. ’S e pròiseact còmhnaidheach do dh’oileanaich na h-àrd-sgoile ann am foghlam ann an Alba a th’ ann, suidhichte ann an Àrd-sgoil a’ Phluic sa Ghàidhealtachd an Iar.
’S ann a gheibhear a-steach air deuchainn-chluiche, agus faodaidh sgoilearan falbh ann aig bliadhna sam bith tron àrd-sgoil. Ionnsaichidh iad cluich agus seinn (an dà chuid beò agus san stiùidio), sgrìobhadh agus eagrachadh ciùil, eachdraidh agus co-theacs a’ chiùil thradaiseanta, ceàrd fear/bean-an-taighe, teicneòlas ciùil, agus farsaingeachd eile de na sgilean nach b’ fhuilear don cheòladair phroifeiseanta. Bidh na h-oileanaich gan cumail trang le cluiche, agus bidh an t-Ionad a’ cur a-mach CD coimeirsealta gach bliadhna. ’S e cunntas claisneach a th’ anns a’ ChD seo, agus tha a riochdachadh na pàirt stèidhichte den bhliadhna. Tha an t-ionnsachadh ga lìbhrigeadh le ceòladairean proifeiseanta fiosrachail, agus ’s e an t-amas gun tèid na h-oileanaich a dheisealachadh airson foghlam a bharrachd air neo dreuchd ann an ceòl, mas e sin a tha bhuapa.
Tha e cudromach cuimhneachadh, ge-tà, nach eil an t-Ionad ann do cheòladairean proifeiseanta a-mhàin. Tha gu leòr den luchd-ceumnachaidh air diofar dhreuchdan a leantail, ach bheir iad an ceòl leotha ge brith càit an tèid iad. ’S e aon de na h-Amasan a th’ aig an Ionad “Gus tuigse a thoirt do na h-oileanaich againn air dualchas, agus an t-àite a th’ aca fhèin ann.” Bidh na h-oileanaich a thig dhan Ionad comasach air a’ cheòl aca fhèin, ach chan ainneamh nach eil aire aca air na freumhan ciùil a th’ aig càch. Leis gum bi òigridh a’ tighinn dhan Ionad bho air feadh na h-Alba, bidh aire ga togail nam measg air dualchasan ciùil càch a chèile, agus sin a’ lìonsgaradh nuair a thogas na h-oileanaich orra an dèidh na sgoile.
Tha uallach air an Ionad airson gach dualchas ciùil ann an Alba, ach air sgàth na sgìre aice, agus leis gu bheil cuid mhath de na h-oileanaich a’ buntainn ris a’ Ghàidhealtachd, tha deagh làthaireachd aig ceòl na Gàidhlig ann. A bharrachd air an taobh seo, ’s e inneal fheumail a th’ ann an ceòl Gàidhlig airson teagaisg cuid de na comasan a bhios an t-Ionad a’ riatanachadh. Tha cudromachd air seinn aon-neach san dualchas Ghàidhlig, ach bidh an t-Ionad cuideachd a’ cur cuideam air cluich còmhla ri daoine eile agus leasachaidhean ùr-nòsach ann an dualchas a’ chiùil thradaiseanta.
Tha na ruidheaman agus fuinn a gheibhear ann am puirt-à-beul agus sna h-òrain luaidh glè fhreagarrach sna suidheachaidhean seo, agus iad a’ toirt cothrom math do dhaoine le ionnsramaidean a bhith a’ cur ris na sgilean ciùil-thaice aca. Tha dualchas mòr farsaing aig ionnsramaidean ann an saoghal nan Gàidheal, gu h-àraidh a thaobh ceòl na pìoba agus na fìdhle, agus ’s e tobraichean beairteach de phuirt a th’ annta seo do neach- agus luchd-ciùil.
Bidh na clàraidhean-fuaim air an duilleag seo a’ sealltainn mar a dhèiligeas an t-Ionad ri òrain Ghàidhlig. Tha gach òran tradaiseanta, agus an suidheachadh a’ freagairt air brìgh gach òrain, ach cuideachd tha ùrachadh beag nan cois a tharraingeas an luchd-èisteachd riutha.
Thuirt Stiùiriche na Sgoile Dougie Pincock:
“’S e a bhith a’ cumail tuigse ris na h-oileanaich air an àite aca fhèin an cois slabhraidh dualchasan ceòl na h-Alba air aon de na dleastanasan as cudromaiche againn, ach tha e na urram agus na thlachd mòr faicinn mar a chòrdas e riutha a bhith ag ionnsachadh agus a’ cluich a leithid a’ chiùil mhìorbhailich ’s a th’ againn ann an Alba. ”
Nochd na h-earrannan a leanas sna nòtaichean airson gach òrain anns an CD san do nochd iad:
- Tobair Tobair Siollaidh (à “First Class”, SCGCD001, foillsichte 2001)
Chaidh an t-òran seo ionnsachadh dhuinn le Màiri Anna NicUalraig, agus ’s e geas a rachadh a sheinn an àm tarraing uisge às an tobar. Mar a bh’ ann, cha robh ann ach aon rann, ach chuir sinn earrannan ionnsramaideach ris airson a leudachadh a-mach. - Smeòrach Chlann Dòmhnaill (à “Duck!”, SCGCD005, foillsichte 2005)
’S e rainn thaghta a tha seo às an òran le Iain mac Fhearchair, bàrd do Shir Seumas MacDhòmhnaill Shlèibhte, an 8mh Tighearna Shlèibhteach. Bhuineadh Iain do dh’Uibhist a Tuath, far an robh fearainn le MacDhòmhnaill Shlèibhte. Tha an t-òran a’ sìor-fhàs na mholadh do Chlann Dòmhnaill, agus an t-òran seo a’ sìor-fhàs na ho-ro-gheallaidh. - Macreach An Each Dubh A Sassain (à “The Right Path”, SCGCD016, foillsichte 2016)
’S ann mu each, agus Raghnall MacDhùghaill à Uibhist am marcaiche, a fhuair òr bhon rìgh airson cruaidhean òir a chur air an each. Chuala Raibeart MacAonghais, am prìomh sheinneadair, e air a’ chlàr aig Raonaid Walker ,“Air Chall”, agus dh’ionnsaich e an t-òran anns na leasain aige còmhla ri Raonaid, a tha bhios a’ teagasg òrain Ghàidhlig aig an Ionad. - Buain A’ Choirce (à “Brick By Brick”, SCGCD017, foillsichte 2017)
’S e òran às an dualchas a tha seo a chuala sinn an tòiseachd air a’ chlàr “Glen Lyon: A Family Song Cycle” le Mairead agus Martyn Bennett. ’S ann mu bhoireannach a shuidh sìos an dèidh dhi a glùn a gheàrradh a’ buain a’ choirce, agus i a’ siubhail airson duine sam bith aig a bheil coltas an fhir ghaolaich aice.
Tobair Tobair Siollaidh
Smeòrach Chlann Dòmhnaill
Macreach An Each Dubh A Sassain
Buain A’ Choirce (à “Brick By Brick”, SCGCD017, foillsichte 2017).
Raibeart Iain MacAonghais
Saoilidh mi gu bheil ceòl tradaiseanta na h-Alba, agus òrain Ghàidhlig gu sònraichte, nam pàirt mhòr den chànan Ghàidhlig. Cuiridh gu leòr de dhaoine rompa an cànan ionnsachadh leis gu bheil eòlas aca air a’ cheòl, air neo gu bheil e a’ còrdadh riutha a bhith ag èisteachd agus a’ seinn nan òran. Mar a th’ ann le cànanan eile, tha feadhainn de dh’òrain Ghàidhlig aig a h-uile duine, fiù ’s mur eil Gàidhlig aca, agus thèid seo a dhearbhadh aig cèilidhean nuair a thogas an luchd-èisteachd am fonn.
Mar phreasantair radio air ceòl ùr ann an saoghal ceòl tradaiseanta na h-Alba, dh’fhaodainn a ràdh le cinnt gu bheil tòrr mòr ceòl ùr ga dhèanamh le luchd-ciùil ùr sa Ghàidhlig, agus sin air a bhrosnachadh aig buidhnean mar a tha Fèisean nan Gàidheal, Sabhal Mòr Ostaig agus Fèis Rois.
Saoilidh mi gum bi stoidhlean ciùil nan òran Gàidhlig a’ sìor-atharrachadh. Mar cheòladair òg mi fhìn, tha mi car neo-àbhaisteach, oir, ged as toil leam òran a bhith air a ghabhail gu togarrach, ’s toil leam a cheart cho math seinneadair a’ seinn leotha fhèin, no clàradh às an tasglann – rud anns nach rachadh tòrr òigridh an sàs an-diugh. Cuide ri bhith a’ cur snas ùr air òrain, tha e cudromach gun cuimhnich sinn air an dualchas agus an sgeulachd a th’ air chùlaibh gach òrain – agus tha e iogantach na h-uiread de thionndaidhean diofrach a lorgar air Tobar an Dualchais, cuid tha còrdadh na b’ fhèarr riut na feadhainn eile air a bheil thu eòlach mar-thà.
Ged as math leam mo chuid rannsachaidh fhèin a dhèanamh air gach òran a ghabhas mi, bha seo cudromach do dh’obair-buidhne aig an Sgoil Chiùil (agus anns gach suidheachadh obair-buidhne san fharsaingeachd) airson gu bheil na sgeulachdan agus coltas gach òrain a’ toirt buaidh air mar a thèid an t-òran a ghabhail. Tha e cho cudromach gu bheil na faclan aig gach duine sa bhuidheann (fiù ’s ged nach biodh Gàidhlig aca – feumar aire a thoirt air ruitheam nam faclan), eadar-theangachadh den òran, bàrd (no fiù ’s ‘gun ainm’), agus cùl-fiosrachaidh an òrain.
Tha e cuideachd cudromach do ghinealach nas òige a bhith a’ toirt aire do na ginealaichean nas sine agus cluas a thoirt ris an dòigh-sheinn – tha corra òran Uibhisteach a ghabhas mi mar a fhuair mi aig mo chàirdean Uibhisteach iad. Chan eil mi a’ dèanamh atharrais orra, ach ’s fìor-thoil leam mar a ghabhas iad iad agus siud an dòigh san deach iad a dh’aiseag tro na linntean!
Bidh òrain Ghàidhlig sàbhailte ma sheallas na ginealaichean òga meas don dualchas sam bheil na h-òrain suidhichte – chan fhiù dìreach a bhith gan seinn no a bhith gan cluich. Tha tòrr a bharrachd an cois nan òran na briathran a-mhàin!
Dòmhnall Barker
Saoilidh mi gu bheil ceòl na Gàidhlig aig crois-rathaid mhòr inntinneach. Ged nach eil aiseag nan òran am broinn theaghlaichean is nàbachdan cho cumanta sa bha, tha goireasan air loidhne an leithid Tobar an Dualchais agus Bliadhna nan Òran a’ leigeil leinn a dhol an sàs ann an ceòl na Gàidhlig ann an dòigh cho furasta. Ge-tà, dh’fhaoidte gur sinne an ginealach mu dheireadh aig a bheil an cothrom a bhith an cuideachd nan seanchaidhean agus nan òranaichean mu dheireadh. Tha e mar fhiachaibh oirnn a bhith a’ glèidheadh uimhir sa ghabhas agus bhiodh e math nan robhar a’ clàradh a bharrachd mar a bha sna 1950an nuair a bha Sgoil Eòlas na h-Alba a’ tòiseachdainn.
Chan ann a-mhàin gu bheil e mìorbhaileach a bhith a’ faicinn ceòl tradaiseanta na Gàidhlig a’ fàs, ach ’s math gu bheil uimhir de phròiseactan agus modhan-obrach ùra gan dèanamh an cois ceòl na Gàidhlig, a’ sèideadh anail às ùr ann.
Leis na fhuair mi fhìn de chothroman tro mheadhan na Gàidhlig, tha mi air a chur romham eòlas òrain na Gàidhlig a dhèanamh aig Sgoil Chiùil na Gàidhealtachd sa Phloc airson na siathamh bliadhna-sgoile agam. Ged a tha mi cleachdte gu leòr ri seinn agus co-sheirm a dhèanamh aig an taigh, ’s e rud ùr a bh’ ann dhomh eagrachaidhean ùra de cheòl-taice a chruthachadh do dh’ionnsramaidean agus chòrd sin rium fhad ’s a bha mi sa Phloc. Chuir seo rim spèis air a’ cheòl agus thug e orm a bhith a’ seinn nas bitheanta gach cuid gu h-ionadail agus nas fhaide a-muigh.