Broadside ballad entitled 'Up and Waur Them A', Johnnie'

Transcription

Up and Waur them
a', Johnnie.

UP and waur them a', Johnnie,
Up and waur them a',
Up and save AULD REEKIE'S pride,
And ding the man o' law !

'Tis here and there, and every where,
We meet the lawyer clan, Johnnie,
Though troth 'twad tak' the haill and mair
To make ae honest man, Johnnie !
Up and waur them a', &c.

A lawyer's at the port o' Leith,
How could the villains daur, Johnnie!
And low 's the choice they've made, gude faith.
The BOTTOM of the bar, Johnnie !
Up and waur them a', &c.

And here a lawyer too we've got
To speechify a wee, Johnnie,
Syne leave us when we've gi'en our vote,
And sell us for a fee, Johnnie !
Up and waur them a', &c.

Oh ! let it ne'er be said or sung,
In this our hour o' need, Johnnie,
That naething but a lawyer's tongue
AULD REEKIE'S cause could plead, Johnnie!
Up and waur them a', &c.

Oh ! let it ne'er be sung or said,
A-begging we should gang, Johnnie,
And seek from far a stranger's aid
To shield our rights frae wrang, Johnnie !
Up and waur them a', &c.

Throughout her streets and squares sae grand,   
Where TRADE and WEALTH abound, Johnnie,
Should nane, to lend a helping hand,
Among her sons be found, Johnnie ?

Up and waur them a', &c.

Yes, ANE is found, wi' faithfu' heart,
Our honour to maintain, Johnnie,
Already weel he's played his part,
And weel he'll do't again, Johnnie !
Up and waur them a', &c.

The ANCIENT SEAT of Scotland's CROWN,   
Her Parliaments an' a', Johnnie,
Shall never wear the bauchled shoon
That DUDLEY'S coost awa', Johnnie !
Up and waur them a', &c.

For ance, though ne'er they do't again,
Shall Whig and Tory 'gree, Johnnie !
We'll choose a man frae 'mang OUR AIN,
And put that choice on thee, Johnnie !
Up and waur them a', &c.

Though sair our faes wad haud us down,
The victory we'll get, Johnnie,
And, spite o' Campbell's silken gown,
We'll see him worsted yet, Johnnie !
Up and waur them a', &c.

Though long the Clique has o'er us stood,
And tried the law to gie, Johnnie,
There's that within our Auld Town blood,
At last shall make us FREE, Johnnie !
Up and waur them a', Johnnie,
Up and waur them a',
Up and prove AULD REEKIE'S SON,
And ding the man o' law !

previous