Broadside ballad entitled 'Sodger Jock'

Transcription

SODGER JOCK

PRICE ONE PENNY.

Copies of this popular Comic Song can always be had at 80 London St.,
Glasgow.

TUNE?" Coal Jock."

        Noo, chaps and wunches a',
        Div I no look reg'lar braw,
Since I 'listed for a sodger in the ranks ?
        Od ! I've got a braw new hat,
        This thingamybob, an' that,
And some twenty yards o' tartan round my
               flanks.

CHORUS.

        I can march or staund at ease,
        Or shoot rifles on my knees ;
I can walk as strecht as ony o' them a'
        I can halt, or I can wheel;
        Od! I'm up tae a' the drill,
But I wush this blastit choker was awa'.

        I've a pilly in my breast,
        I've a pilly in my breast,
But it seems to be the fashin' wi' them a',
        Och ! it doesna dae nae harm,
        And it helps to keep me warm?
It'll maybe keep the rifle balls awa'.
                I can march, &c.

        It's better wi' a plaid
        O'er a body's shouther laid,
Than be mountit wi' a black coal pock ;
        An' a red coat looks as weel
        As black moleskin on a chief,
An' it looks a deil sicht better on Coal Jock.
                I can march, &c.

        It's a better life for me
        Than coal weighin' on the quay,
To be dreelin'   round about   the   Castle
               Square;
        An' ye never want a meal,
        For it's brocht up in a pail?
Jist as muckle's ye can wrastle wi', an'
              mair.
                 I can march, &c.

        But it's chawin' if ye be
        Wi' your chums upon the spree
An' the bugle, blastit humbug, sounds the
         "ca';"
        Ye maun rise and tak' the rout,
        Double-quick-march?wheel about?
Toss your gless aff, say?" guid nicht," an'
            come awa'.
                I can march, &c.

        Says oor sairgent jist the day,
        " Jock ! ye'll sune be gauu awa'
Oot tae Indy, for tae fecht the Blacky-
              moors;"
        But I'll tak' my rifle heft,
        And I'll paste them richt and left,
An' I'll dimple in their goblets wi' the
        cloors.
                I can march, &c.

        Wull I no be on my legs
        Wi' the sugar an' the fegs,
An' the cockernits in thumpers like my
            head?
        Oh ! new glories wait for Jock,
        I'll get plenty there to smoke,
An' get oringers an' trecle fur a feed.
                I can march, &c.

        When the heavy swells gang by,
        I maun boo, an' they reply ;
They jist speak to me the same as ither folk;
        I'm as proud's a parish priest
        Wi' a pillow in my breest;
Hooch! they've made a perfect gentleman
           o' Jock.
                I can march, &c.

        I've a brush an' reddin' kaim
        In my knapsack a' at hame,
An' a 'bawky box o' blacknin' for my bits ;
        An' some whitnin'-I was telt
        For tae rub upon my belt,
An' their splasher-dasher things upon my
            clitts.
                I can march, &c.

        Sic braw stockin's ne'er wur wore
        On a carter's shanks before;
But   there's   jist   yae   thing aboot   them
            bauthers me,
        For I canna see the way
        'At the ither fellows tie
This fancy knot o' ribbons at the knee.
                I can march, &c.

        I could plett as guid a whup
        As the nieve could wish tae grup,
And I'll tie her on the wuddie wi' the best,
        But I'm dasht if I can fa'
        On this blastit knot at a'?
I'm just ten times langer tyin't than the
            rest.
                I can march, &c.

        But my frien's, I maun be gaun,
        Or the bugle 'll be blawn,
An' they'll lock me in the guard-room right
            an' tight,
        So I want to get the stripes,
        An' tae learn tae play the pipes,
An' of coorse I maun be dacent-so guid
            nicht !

                CHORUS.

        I can march or staun' at case,
        Or shoot rifles on my knees ;
I can walk as strecht as ony o' them a',
        I can halt, or I can wheel?
        Pooh ! I'm up tae a' the dreel?
There's the bugle!    Chaps, guid micht !
             I maun awa'.

Saturday, May 22, 1886.

P.D.?15-1-76.

previous