Eglamour with Balade (Page 7 of 36)
(p.59) I sall hym neuer forsake
The Erll sayis be mary clere
Thou sall feght thare with thi fere
A chylde men callit arrak
The knyght thoght than on cristabell
And sware be hym that heryit hell
That deide I vndertake
kepe weill my lady & my lande
Thare to the Erll helde vp his hande
And trouthis sammyn thai strake
Efter met as I herde say
Sir eglemor tuke the way
To that lady fre
He sayis damysell on ane
For thi luf I haf vndertane
Deidis of armys thre
Scho ansuerde sir ma the glad
A hardare iournay neuer thou hade
In lande no na cuntre
For or thou fra thi iournayis pas
For my luf thou sall say allas
And mony mourn for the
Sir in hountyng gif thou foundis
I sall the gyf .ii. gude grew houndis
Ar dwn as ony da
As I am trew gentill woman
Was neuer beste that thai at ran
On fute thai walde it ta
A gude swerde I sall gif the
Was fundyn in the greke see
Of tham I knaw na ma
